Uleleanna Massudilalong sola Lebonna

Uleleanna Massudilalong sola Lebonna

                Den misaq tau disanga Dodeng tontong napotunaq Toraya sae lako totemo, biasa lan attu pare bulung (lan pare), Iatu napojaman Dodeng  iamo tu birisan maqbaqta, mangrambi keden mayang ladibaqtai.

                Siumpu’na lante ulelean iate iamo tu Dodeng aba’ta sia mangrambi, den duka da’dua tomangngura lan sikamallingan na, pura siallu’ pada latuo pada lamate, kedennmi ussalai bassena sola dua. Laumoamisamo kale sola dua, latama rampanan kapa’  sila dua kenalambi’mi allo maelo, kenadate’mi kulaq mapiadadi.

                Tomangura iato sola dua, iamo tu anak dara gantaq tongan, mellong tu pantarisanna sia kalandong tu baluakna disanga Lebonna naiatu muane misaq pia ganta  duka disanga Palalunan, diganti Paerengan sia umpoganti Mmassudilalong. Susimoto tu maliqna dua pura nasibassei: “Ten ton ulang maarraq makaridiq, buttung to rariq tangmaraa kaqtu sia ponoq lapada  tuo, lapada manteq.”

                Maqlondemi masudilalong nakua, “Moi tallana to batu, endekna buar-bura, tangtallan ia maliq, mandaq, tabole-bole, matai rindu , pada ditambuttanakiq.”

                Pada mangalluqmi sola dua, kumua, “Pemali, pemali tongan, ketang ampunnapia.” Susimoto tu kasibasseanna te tomangura sola dua, natigenaq-genaq lan tondok.

                Tae namasai allaqnato denmi, nasirari tu tau. Malemi tu massudilalong sola baanana lalao parari. Iatu massudilalong, misa paqbarani. Ia tonnamatangngamo tau parari, demi misaq tau tangmaqtangaq lasule umpobaine Lebonna belanna iatu Lebonna baine ballo, kalandong beluakna. Naporarimi lako Lebonna kumua iatu Massudilalong mangkamo dipongko lan kasirarian.

                Masussami penana tu Lebonna urrangi tu kareba iato, Taebangmi nammamaq sia taeq duka namorai kumande. Nakilalai Lebonna tu kada mangka nasibassei  Massudilalong kumua, “ Pada tuo pada mateq.”

                Naraqtami Lebonna lamale mentuyo, nakua “Apa gaiqku tuo, namatemo tu Massudilalong, muane kukaboroqi sia kukamalling.” Malemi untokeq kalena mentuyo, namate.

                Massusa tongan tu tomatuanna Lebonna ungkilalai tu kamateanna Lebonna, tangna daranai, tangaoa, namatemo dikkaq. Malemi naala tu batang rabukna Lebonna anna allukki. Mangka dialuk, malemi dipeliang.

                Taeq namasai, sulemi tu tau parari. Ia tu Massudilalong sule dukami. Ia tonnarangimi Massudilalong kuami mangkammo tu Lebonna mate mentuy, lenduqmi massusanna sia maqipu-qipu tongan. Masussa tongan penaanna sia tangkumande, maqinaa-naa ungkilalai tu kada mangka nassibassei Lebonna kumua pada tuo pada mate. Malemi ussalioi penaanna sia ussalioi paqdiqna.

                Den pissan, malelemi tu Dodeng lalao mangrambi sia umbaqtai tuakna. Iatu tu nanii mambaqta sia mangrambi sikandappi toq liang.

                Ia tu liang iato, dinii umpeliang Lebonna tonnamate mentuyo. Kendekmi tu Dodeng langngan toq mayangna, anna baqtai tu tuakna. Mangka mabaqta to, naparandukmi mangrambi. Marassan tu Dodeng mangrambi pakalan denmi tu bating narangi siqdan-siqdan tongan sia memallo-mallo. Tialling lan talinganna Dodeng, dan dirunduan tu sanganna Dodeng lan bating iato. Ia tonnaperangi Dodeng tu bating,  nakanassaimi kumua iatu toumbating iamo tu Lebonna dikkaq.

                Naalami Dodeng tu tuakna sule lako banuanna. Rampo lako taeqi namamammaq untangaqi te diona bating narangi.

                Masiang poleqto, malemi tu Dodeng lalao mambaqta susi tu biasanna. Ia namangka mambaqta, narambimi tu mayang. Ia tonnamarassan mangrambi, denomo tu bating narangi memallo-mallo tongan, susi bangsia tu mangka narangi yongiq.

                Iatu bating narangi nakua :

                Dodeng mangambi, mangdedek!

                Dodeng maqpatuang-tuang

                Ranpanampi pededekmu,

                Annapi pepamaruqmu

                Ammu peranglipaq mati

                Ammu tanding talingapaq

               

                Parampoannaq malloko

                Pepasan mase-maseku

                Lako ambeq Palalunan, diganti paerangan

                Lako tu Massudilalong

                Nakua aku kadangku

                Pepasan mase-maseku

                Nakua, lasangmateqkiq

                Lasangrontaq inayakiq

                Angku dolomo te mate

                Rontaq tondon tobatangku

                Tae duka lamateqna

                Tu la rentak inayanna  

                Mangka narangi nasang Dodeng tu batingna Lebonna, kadake tongan nasaqding Dodeng, tumangimi siqdan-siqdan. Naalami tu tuakna, namengkalao dao mai lolok induk, namale sule lako toq banuanna. Mangngami Dodeng lan pelanna kumua “Inang lamalenaq undakaq Massudilalong, sakuappaqna.” Belanna lakupokadan  te apa mangka dadi iamo tu batingna lebonna dio toq liang mangkao kurangi.

                Malemi tu Dodeng  undakaq Massudilalong, sanaappaqna.

                Masai allaqnato, nakaqbutuqimi Dodeng tu Massudilalong, sipakadami sola dua. Naparanponasangmi Dodeng lako Massudilalong  tu mintuqna bating narangi dio toq liang. Ia tonnarangi nasangmi Massudilalong te mintuq pepasanna Lebonna naparampo Dodeng, titambangmi aqipu. Siqdan-siqdan tongan tumangiq ungkilalai tu apa mangka nasibassei pirabongiq, kumua padatuo, padamate Lebonna.

Maqkadami Massudilalong lako Dodeng nakua, “Umbara muni mambaqta.” Maqdinraka talao sola, kemaloko mambaqta? Nakuami Dodeng, “Daqmo milao manasaa massussakiq sia mambela.”

Daqmi undi, kubanbangmorokomi tu tuak kesulenaq mambaqta. Apa nakua Massudilalong, “Mammiq iatu tuak kedi iruq dio o garontoq induk. Magasa tu penanna Dodeng keundi tu Massudilalong nakua, Iamoke mangrambinaq naumabating tu Lebonna, narangimi Massudilalong natiramban.” Apa naparuku Massudilalong undi.

Maqkadami Dodeng nakua “Yammi lamale, daqmitiramban kedenni bating mirangi dako kemangrambinaq.” Napasituruqmi Massudilalong namale Dodeng ussolanni. Rampo lako to induk, marassan Dodeng mangrambi tatkala denmi bating narangi memallo mallo tongan, nakua :

E Dodeng! Dodeng mangrambi mangdeek

Dodeng maqpatuang-tuan

Rampananpi padedekmu, annapi pemaruqmu,

Ammu perangipaq mati , ammu tanding talingapaq.

E dodeng parampoannaq kadangku pepasan mase-mmaseku

Lako ambeq Palaluan, diganti  Paerengan

Lako tu Massudilalong

Nakua lasangmantekiq, lasangrontoq inayakiq

Angku dolomo te mate, rontaq tondon tobatangku

Tae duka lamateqna tu larontaq inayanna.