Batu Tumangi

          Lan misa’ tondok, den misa’ tomatua baine. Maparri’ katuoanna. Tang nakullemo apa napangu’kui

bang mengkarang. Keallo- keallo male bang umpasiduruk  kayu tutungan. Nakolongngi  tama pasa’ Iamo napakumandean to. Den sia anakna misa’, pia baine. Manakkamo, apa tukkunan.Dio bang banua, manoka narua riga , sangadi  umbeloi kalena. Natiro-tiro  bang tu indo’na mengkarang magasa, undaka’ kaparaluanna keallo-allo. Iake denni  tau umpalilalai, mebaliora ia, nakua: “  ah, jamanna ia tomatua ia tu undaka’ kande sia mengkarang.

          Malemi ma’pasa’ tonna Sangallo, tama kota sola duai. Lumingka lako lalan, dolo bang  tinde pia baine, anak dara. Undi bang tu indo’na ungkolong  kayu. Lolong-lolong ma’pu’na buda tau undoloi lako lalan. Saba’ tang na bela lumingka. Buda duka tau  nasitammuan . Nenne’ duka sipa’kada-kada tau na mukkun lumingka.

            Ba’tu piramo tau mekutana lako tu anak dara. La to nasiturusan ia to nasitammuan. “ Mu tampe bangri tu indo’mu na tang nabela sia magasa pamaanna?: “ Tangia indo’ku, tu! Tomengkarangku ia tu!”. Maleso bang narangi indo’na, napokada susi to, lako to mai to mekutana. Sa’bara bang tu indo’na, Undi tipe’long-pe’long sikolong kayu tutungan mambelamo naola. Budamo tau napebalii anakna, ma’kada tang tongan . Ungkasirisan indo’na. Rampomi lako misa’ garonto ‘ kayu kapua. Torromi mentuangin tinde to matua . Tang natananmo, malassu tu allo. Unno’ko’mi, massambayang, Umpassambayangan anakna nakua: “O Puang! Benni kakinaan tinde anakku. Kamasei, da napodioan pudukki tu kadanna, ungkasirisanna’. O Puang! Kupakaboro’ tongan tu anakku. Ada’i kamaleoan menassan sia manii….”

                 Mukkun bangsia mengkamoya-moya tinde tomatua, o, na tae’mo natitengka lentekna tinde anakna. Magasamo natiromi tu lette’na, a’a’ mendadi batumo. Maneri menassan, mengkagarri’-garri’ sia tumangi’. Pakalan, mukkun tumangi’ mukkun duka mendadi batu te kalena landa’ langngan botto ulunna. Buda uai matanna. Apa ladi apari, dadi batumo dio randan lalan. “Batu Tumangi”.